مدونة اليوم

غادة عبد العال : "عزيزي عاشق نظرية المؤامرة"

سمعي
مونت كارلو الدولية

في إطار نظريات المؤامرة اللي احنا بنعشقها زي عنينا، وفي المناخ الشبيه بأفلام الخيال العلمي اللي احنا عايشين فيه حاليا، كان من الطبيعي ظهور عدد من التفسيرات المؤامراتية لظهور وانتشار فيروس الكورونا، من أول إن ده مش فيروس ولا حاجة وإن ده تأثير موجات تكنولوجيا الجيل الخامس، لإنه مؤامرة غربية على دول العالم الثالث لإفنائها، لإنه فيروس طوره مجلس إدارة العالم للتخلص من كل الضعفاء كمحاولة لإنقاذ الكوكب اللي طهق من ساكنيه.

إعلان

وعلى الرغم من إن الأيام أثبتت إن المرض حقيقي فعلا مش من إنتاج ستيفين سبيلبيرج، وإن الدول الغربية بتتأثر بيه زيها زي دول العالم الثالث، إلا إننا كل يوم بنسمع عن نظرية جديدة عن مؤامرة جديدة بينسج خيوطها ناس خيالهم واسع فقط لأنهم على مستوى اللاوعي قد يكونوا غير مصدقين إن بعد التطور اللي وصلت له البشرية ده كله، فكائن غير مرئي بالعين المجردة قادر إنه ينيمنا كلنا من المغرب في بيوتنا من أقصى الأرض لأقصاها.

والآن بعد أن أثبتت البشرية جدارة، ووصلوا للقاح واتنين وتلاتة، وبدلا من الاحتفال والاحتفاء بصناع اللقاح، ظهرت نظريات جديدة وسيناريوهات لمؤامرات أكبر متعلقة باللقاح.

وعدد كبير من الناس حتى اللي بنحسبهم عاقلين، بدأوا في نشر دعوات لمقاطعته وتجاهله بل وحتى محاربته ، مش حتى على أساس إنهم شاكين إنه محتاج يختبر فترة أطول أو لازم تتم تجربته على عدد أكبر قبل ما يتم تعميمه، ولكن تبني لنظريات خزعبلية عن تضمينه لشرايح تتبع تتيح لأسياد العالم التجسس على البشر وعلى كل تحركاتهم وأفعالهم وأفكارهم، وكأن مش كل واحد من المبشرين بالنظريات دي شايل في جيبه تليفون بيقوم بكل وظايف التجسس والتتبع دي وهو شايف ده بشكل يومي ومتقبله عن طيب خاطر وعلى قلبه زي العسل.

هذه النظريات مش خاصة بعالمنا الثالث الغارق في النوم والكسل، وإنما هي منتشرة كمان في دول العالم الأول وبين مواطنيه، لكن على أي حال فمواطني هذه الدول من حقهم إنهم يقلقوا على منجزاتهم العلمية وأفكارهم المفيدة للبشرية وأحلامهم المتاح ليهم تنفيذها في يوم من الأيام.

 إنما إحنا بعون الله باتعجب دايما إحنا خايفين إيه بالظبط يتسرق مننا ؟ إيه هي القدرات العظيمة اللي متخوفين إنهم يستغلوها؟ إيه هي الأفكار النابغة اللي متركزة في تلافيف مخنا اللي محتاجة حد يركب شريحة جوه لقاح ويخترع له فيروس عشان يوصل لها ؟

عزيزي مواطن العالم الثالث المؤمن بكل نظريات المؤامرة، إلبس كمامتك، رش كحولك، وأول ما ينزل اللقاح تجري تاخده وانت من جواك بتدعي للي قدح زناد فكره واستخدم علمه وأفكاره عشان يعملهولك ويجيبهولك لحد عندك بدون أي إسهام يذكر ليك يخليك تستحق وصوله ليك بالسهولة دي.

وأشوفك بعد كام 100 سنة، لما تكون اتطورت واتعلمت وقدرت يكون لك صوت وتأثير واختيار وكرسي على مائدة الكبار وصناع القرار. 

غادة عبد العال

     

 

 

 

 

الرسالة الإخباريةأبرز الأحداث الدولية صباح كل يوم