مدونة اليوم

غادة عبد العال : "عيد العزاب"

سمعي
مونت كارلو الدولية

هذا الأسبوع تمرعلى كوكبنا المريض ذكرى عيد الحب، وعلى الرغم من حاجتنا الشديدة للمشاعر الطيبة والطاقة الإيجابية في هذا العام اللي ما اختلفش كتير عن أخوه الأسبق، لكن ده لا يمنعنا نحن معشر العزاب إن اليوم ده يمر علينا ومعه بعض المرارة مش بس عشان هنقضيه لوحدنا بدون احتفال ولا دباديب، لكن كمان لأنه بيفكرنا بإننا شريحة من شرايح المجتمع اللي دايما بيتبصلها في مجتمعنا نظرة موشاة بالاتهامات بالبؤس والفشل وعلى أفضل حال فالمجتمع بيتجاهلنا وكأننا مجموعة من الكائنات الشفافة اللي مش من الضروري إن حد يعملّها اعتبار.

إعلان

كما هو معلوم فالوحدة الأساسية لبناء المجتمعات العربية هي الأسرة، بيتم صياغة كل القوانين والخطط والسياسات وهي في الأذهان، أما إذا كنت لأي سبب قررت، أو قرر لك القدر إنك تعيش عازب، فهنا المجتمع ما بيعرف يعمل بيك إيه، وعلى الرغم من نمو شريحة العزاب في المجتمعات العربية سواء من الرجال أو النساء لأسباب كتير منها اقتصادية ومنها اجتماعية، إلا أن المجتمع رافض الاعتراف بيهم كمجموعة موجودة من البشر وبيعتبرهم فقط مجرد خطأ استثنائي في المنظومة، لهذا فصعب تلاقي بيئة داعمة لأي سينجل في منطقتنا العربية من أي اتجاه!

لو بتأجر أو تشتري شقة للسكن، فانت مضطر لشقة كبيرة أو لتقاسم شقة مع عدد من الأشخاص، عشان مافيش ستديوهات ولو فيه فهي بتعتبر حاجة "تريندي" جدا فلازم ثمنها يبقى ضعف ثمن الشقة العادية.

هتشترك في نادي؟ غالبا ماعندهومش اشتراك فردي، بتدفع زيك زي عيلة من ٤ أفراد ولو حاولت تشرحلهم الحقيقة دي مش هتلاقي غير أمنيات بإنك إن شاء الله مستقبلا تستقر وربنا يهديك وتلاقي حد يلمك بأه.

السيارات الصغيرة برضه اعتبروها شيء مميز ويندرج تحت بند الرفاهية فبيسعروها أحيانا أغلى من السيارات العائلية الكبيرة.

حتى الأثاث القليل اللي ممكن يناسبك كعازب  ومصنوع تقريبا من ورق مقوى هتلاقيه برضه بيعتبر تريند وسعره أغلى عدد من المرات من الأثاث المخصص للعائلات. 

إذا فالنتيجة إن مجتمعاتنا العربية بتتعامل مع فكرة العزوبية بطريقتين عكس بعض تماما، يا إما هي مجرد فشل و خطأ مؤقت لازم الإنسان يجتهد لتصحيحه، أو  أنها فترة رفاهية ودلع تستدعي إنك تدفع دم قلبك للاستمتاع بها.

يا إما بأه بيتعاملوا معاك بطريقة تالتة معتمدة على التجاهل التام ليك كفرد له قدر أو اختيار أو احتياجات مختلفة لكنها حقوق إنسانية من حقك تحصل عليها.

قد يكون من المفيد إننا نطالب مثلا بعيد معتمد للعزاب لعله يكون سبب في انتباه مجتمعاتنا لينا وتذكرهم لإننا موجودين؟ .. يجوز يكون هو ده الحل. إذا فخليني أبدأ باقتراح إن اليوم التالي لعيد الحب مثلا يكون هو عيد العزاب، يمكن يعيده الله علينا في يوم ما باليمن والبركات والاعتراف الرسمي بينا كفئة ليها اعتبارها من فئات المجتمع !

غادة عبد العال

 

 

الرسالة الإخباريةأبرز الأحداث الدولية صباح كل يوم