مدونة اليوم

غادة عبد العال: "ثمن الشهرة"

سمعي
مونت كارلو الدولية

ليس هناك شك في أن حياة المشاهير بها عناصر جاذبة للانتباه. الأضواء، الأزياء، الدراما، الفكاهة، حكايات ما وراء الكواليس والأبواب المغلقة. النميمة المفضلة للجماهير على اختلاف أماكنهم الجغرافية في أي مكان في العالم ستجدها مرتبطة ارتباط تام بالمشاهير وخاصة أهل الفن منهم. وكما في الحياة كما في الموت. 

إعلان

لا يختلف موت المشاهير بالنسبة للمتابعين كثيرا عن حياتهم، نفس الاهتمام، نفس المتابعة، نفس تتبع التصرفات والملابس والحركات والسكنات عشان يلاقي الجمهور فيها أي غلطة ويشاوروا ويقولوا: شوفت.. مش قولتلك مجتمع كله غلط، أو شوفتي.. مش لسه قايلالك إنهم أحسن من ناس كتير.

ويتناسى الجمهور أن المشاهير أيضا بشر، يحتاجوا لوقت للحزن ووقت للتدبر ووقت للتذكر ووقت للبكاء.

في كل جنازة لفنان أو مشهور، هتلاقي ناس بتصور وناس بتتصور، وناس جاية تسلم على فنان بيحضر الجنازة ممكن يكون مش شايف قدامه من العياط، وناس بتتخانق وتزق عشان تشيل ميت ما تعرفوش وتاخد حق حمل نعشه من أقرب أقربائه.

وبعد الجنازة إستلم بأه كم من الصور المزينة بحكم مالهاش معنى ولا ليها مجال.

حاجات شبيهة ب: شوفت زعلان على أبوه إزاي؟

ما هو إبن أبوه مات! المفروض يرقص عشرة بلدي؟!

شوفت جوز بنت المرحوم إبن أصول إزاي وواقف ياخد عزاه؟

أيوة يعني؟ أمال الطبيعي إيه؟ يسيب العزا ويروح مارينا؟

شوف يا أخي بعد كل الهيلمان والشهرة والمال.. في النهاية آخرة متر في متر.

أيوة برضه إيه الجديد؟ ما هو كان عارف، هو كان حاجز تربة ناصيتين واتفاجيء؟

محاولة إضفاء نوع من الدراما أو الخيال على حدث إنساني عادي متكرر كل يوم فقط لأنه يحدث لمشهور. يمكن من باب كسر الملل أو رغبة في كسر الروتين العادي للأحداث العادية اللي بتحصل للناس العاديين.

لكنه في النهاية تمن مش من المفروض إن  حد يدفعه، إذا كان الفنان أو المشهور مجبر إنه يرضي الجماهير أثناء حياته، يتصور مع ده ويمضي صوره لده ويدي حديث صحفي لده، وعيلته كمان لازم ينوبها من كل هذا الإزعاج جانب.

لكن مافيش أي منطق إنه هو وعيلته يكونوا مضطرين إنهم يدفعوا من خصوصيتهم ومشاعرهم والمهم كمان بعد موته وخاصة في بلاد زي بلادنا اللي بتمنح قدسية خاصة للموت وتقدر الحزن والمفروض يعني إن أهلها يعرفوا الأصول.

مع كل وفاة لفنان أو لمشهور، بيتم نصب سيرك جماهيري قبيح، زحام ووقاحة وتلصص ورمي جتت وتعالي وإطلاق أحكام واستدرار معاني سخيفة ليس لها موقع من الإعراب.

لا شك أن للشهرة ثمنها، وأمام الثمن توجد امتيازات كتير، لكن ألا يجب أن يتوقف دفع الثمن، أي ثمن عند لحظة الوفاة؟

 غادة عبد العال 

الرسالة الإخباريةأبرز الأحداث الدولية صباح كل يوم