غادة عبد العال: "أن تكوني ماجي"

سمعي 02:42
مونت كارلو الدولية

كلما كانت هناك مناسبة كروية متعلقة باللاعب المصري الملتحق بصفوف ليفربول الانجليزي محمد صلاح، وكلما كانت تلك المناسبة يترتب عليها فوز مو صلاح بلقب أو جائزة أو تقدير، كلما تحسست مسدسي.   

إعلان

فصلاح من اللاعبين الليي بيحبوا يحتفلوا مع عائلاتهم، وده بيتطلب ظهور زوجته ماجي وابنتيه مكة وكيان، وهو ما يترتب عليه دفس ملايين الأنوف العربية في شؤونهم. فبعيدا عن التهاني بالفوز أو الإنجاز نجد تعليقات من عينة: مراتك تخنت يا صلاح، بنتك هتتحجب إمتى يا صلاح؟ بنطلون المدام ضيق قوي يا صلاح، إنت ماسك إيدها كده ليه يا صلاح؟ خلاص يا أخي عرفنا انكم متجوزين مش لازم قدام الناس كده. مئات الآلاف إن لم يكن ملايين التعليقات اللي لا هدف لها سوى استهداف زوجة وأطفال كل اللي عايزينه إنهم يحتفلوا مع رب أسرتهم بإنجازه.

أما إذا كان تبرير ده عائد لإنهم عيلة مشهورة تحيا بمزاجها أو غصب عنها في دائرة الضوء، فماذا عن ملايين أخريات لا يعيشن حياة ماجي لكنهن يعانون معاناتها ؟

ماذا عن الشعور الدائم اللي بتحسه كل امرأة إنها مراقبة؟ تخنت، خست، لبست واسع، لبست ضيق، اتخطبت، اتطلقت، حملت، اتأخرت في الحمل. إنتي تحت ميكروسكوب دائم من المحيطين بيكي، لا يتركوا شاردة ولا واردة إلا وقرروا إنهم يحشروا نفسهم فيها سواء أكنتي ماجي أم لم تكوني. صحيح ما بيهتموش قوي بإنجازاتك العملية، ماجيستيرك، ترقياتك، تقديراتك، فانجازاتك الشخصية شيء ما يهمهومش للدرجة، لكن ما قدره لك الله، نصيبك في الدنيا اللي مالكيش دخل فيه، هو ده هدف حسدهم وحشريتهم.

أزيدك من الشعر بيت، مش حياتك بس اللي بيعشقوا يتحشروا فيها، لكن موتك كمان. اتوجهتلي أنا شخصيا مثلا مؤخرا أسئلة خاصة بميراثي بعد موتي وهيتوزع ازاي؟ بما إني أم لطفل متبنى، فده كان بيشكل لنساء العائلة معضلة كبيرة ومجموعة أسئلة قدرية لازم يوصلوا لإجاباتها. رغم إنهم مش داخلين في لستة الورثة ولا ليهم ناقة ولا جمل في الموضوع كله، لكنها حشرية من أجل الحشرية، أو من أجل هدف أسمى ألا وهو .. مش عارفة إيه بالظبط!  بس مش عايزة أتخيل إن كل هذا المجهود الذهني والجسدي والمعنوي بيبذلوه فقط من أجل شغل الفراغ، ولتحقيق اللاشيئ.

انشغلوا بحالكم يا جماعة، وخليكم في نفسكم، حتى في حالة كلامنا عن المشهورين والشخصيات العامة، خلينا في المعقول، حتى لو اتتافهنا، تفاهتنا تبقى موجهة، يعني بدل ما نقرا مقالة طويلة عريضة بتتكلم عن شعر بنت محمد صلاح الصغيرة، اتكلموا عن شعره هو، والا لبسه والا ماركة جزمته. سيبوا الستات والأطفال اللي بالإضافة لكاميرات مراقبة المجتمع، مضطرين يواجهوا كاميرات الصحافة والإعلام.

أما بالنسبة لحشر المناخير في حياة غير المشاهير، فأرجو أن يحتفظ كل مواطن ومواطنة بأنوفهم فوق وجوههم، بعيدا عن أحوال الآخرين بحق جاه النبي. 

غادة عبد العال   

الرسالة الإخباريةأبرز الأحداث الدولية صباح كل يوم