تخطي إلى المحتوى الرئيسي
مدونة اليوم

غادة عبد العال: "كيف سينتهي العالم! "

سمعي
مونت كارلو الدولية

مساء الخير يا ماميز أنا مامي تسنيم، تسنيم راجعة من المدرسة بتقول إن معاهم ولد إسمه حسام كان بيعطس في الباص النهاردة، لو سمحتم مين مامي حسام هنا، طالما إبنك عيان لو سمحتي خليه في البيت بدل ما يعدي بقية الأولاد .. شكرا.

إعلان

مساء الخير يا ماميز أنا مامي حسام، أنا سألت حسام وهو حلف لي إنه ما عطسش ولا مرة طول ماهو في الباص، بس هو قاللي إن فيه ولد إسمه مازن كان بيكح النهاردة في البلاي جراوند، فعايزين كلنا نتعاون ونكلم مامي مازن تعزله عن الولاد لحد ما يبطل كحة  ودي حاجة ما تزعلش والحذر واجب .. شكرا.

السلام عليكم يا ماميز أنا مامي مازن، أنا إبني عمره ما كح في حياته، مش بس كده، ده أنا  وأنا حامل فيه عمري ما كحيت، ده أنا كمان من يوم ما اتخطبت لأبوه لا أنا ولا أبوه ولا حد من عيلة أبوه كح ولا عطس ولا حتى بنتتاوب قبل ما ننام، يا أيها الذين آمنوا إن جاءكم فاسق بنبأ فتبينوا .. شكرا.

يا ماميز أنا مامي نسمة عيلة مازن جيراني من زمان وأشهد إنهم ناس محترمين ما بيتتاوبوش, المشكلة مش في مازن, المشكلة في ال 6 أطفال اللي في الكي جي اللي أنا بعنيا شوفت قناة البي بي سي بتأكد إنهم عندهم كورونا ومع ذلك المدرسة مخبية.

يا ماميز أنا مامي شاهندا، 6 أطفال إيه اللي بتتكلموا عنهم؟ أنا سمعت إن فيه 24 مدرس من المدرسة اللي جنبنا بيقفوا كل يوم في المرواح ينفخوا كورونا في وش الأولاد، كل ده عشان غلبناهم في دوري المدراس السيميستر اللي فات، حسبي الله ونعم الوكيل فيهم.

يا ماميز أنا مامي وليد,  إبن عم جوزي بيشتغل في أمن الدولة وبيقول إن فيه الإخوان بيحطوا عينات من الكورونا في كراسات على غلافها سبونج بوب ماسك سبحة، أرجوكم اللي عندها كراسات من دي خلينا نتجمع يوم ونجمعهم ونولع فيهم في الميدان اللي قدام المدرسة ردا على كل أعداء الوطن.

 يا ماميز أنا مامي أيتن، أنا شايفة إنكم بتبالغوا شوية، الموضوع مش مستاهل كل الخوف ده، بس في نفس الوقت عايزة أسأل مامي بسملة عن شكل عين بنتها، أنا آسفة بس البنت عينيها ضيقة جدا وكأن فيها عرق صيني، يا ترى حد غيري ملاحظ الموضوع ده؟

أنا مامي بسملة وأقسم بالله ماعندنا أي حد صيني في العيلة، إحنا كلنا من المنوفية أبا عن جد، وآدي صورة بطاقتي وبطاقة بابي بسملة.

يا ماميز واحنا ليه أصلا نخاطر بحياة أولادنا في فترة حرجة زي دي؟ أنا رأيي إن التجمعات خطر جدا دلوقتي، ولازم نقعد كل الأولاد من المدرسة، أنا مامي عبد الرحمن بالمناسبة.

وأنا مامي محمود وموافقة على كلام مامي عبد الرحمن، لازم كل الأولاد يقعدوا من المدرسة عشان التجمعات فعلا خطر جدا جدا دلوقتي، خلينا بأه ننسى الرعب ده شوية ونتكلم في عيد ميلاد محمود، أنا لحد دلوقتي جالي 56 تأكيد بالحضور، حد هييجي تاني يا ماميزعشان أعمل حسابي في التورتة والساليزونات؟

قال نوستراداموس في تنبؤآته الشهيرة، إن العالم سينتهي يوما على أيدي مجموعة من النساء .. أعضاء جروبات الأمهات ..على تطبيق مستحدث .. يدعى الواتس أب.

 

غادة عبد العال  

 

 

 

النشرة الإعلاميةأبرز الأحداث الدولية صباح كل يوم

الصفحة غير متوفرة

المحتوى الذي تريدون تصفحه لم يعد في الخدمة أو غير متوفر حاليا.