تخطي إلى المحتوى الرئيسي
مدونة اليوم

غادة عبد العال: "عيد النساء في مواجهة الوباء "

سمعي
مونت كارلو الدولية

بينما يشعر نصف العالم بالذعر ويستعد النصف الآخر ليلحق به، يهل علينا يوم المرأة العالمي فنقع في حيرة أخلاقية. هل نستمر في الاحتفال به وتكريم النساء والا نفضها سيرة السنة دي ونخلينا في الهلع اللي احنا عايشين فيه؟

إعلان

أنا ببساطة كواحدة من شعب ياما دقت على راسه طبول, ولا وباء يهزنا ولا فيروس يهمنا, قررت أتعامل مع يوم المرأة العالمي السنة دي كما أتعامل معاه كل سنة، بحزمة من النصائح لزميلاتي في الشقاء، كل امرأة تعيش في هذا الجزء المحسود من العالم.

ولهذا فهذه 8 نصائح بمناسبة يوم المرأة في 8 مارس المجيد:

1-

ما تتغيريش عشان حد، هيكون هو أول واحد هيبصلك بعدها باستغراب ويقولك إنتي ليه ما بقيتيش زي زمان؟ لو هتتغيري اتغيري عشان نفسك وبس مش عشان أي حد تاني.

2-

تعاملي مع نفسك كبني آدم مش كزائدة دودية ملحقة بجسد حد تاني، ما تستمديش نجاحك واستقرارك وفخرك من حياة حد تاني, إعملي لنفسك حياة وامليها إنجازات وافتخري بيها, وطبعا ما تخليش أقصى حاجة تفخري بيها إنك بقيتي مدام فلان.

 

3-

خلي عندك هدف أساسي في حياتك وهو إن يكون لك ذمة مالية منفصلة عشان يكون قرارك من دماغك ومصيرك في إيدك وماحدش يقدر يجبرك (بالعافية أو بالذوق أو نتيجة لظرف أو احتياج) تكملي في علاقة أو مكان أو موقف إنتي مش عايزة تكملي فيه.

 4-

ما تخليش حد يبتزك عاطفيا عشان تعملي حاجة إنتي مش عايزة تعمليها, حبك للناس وولائك ليهم لا يعني إنك تتخلي عن شخصيتك وحياتك وأحلامك عشان ترضيهم, هم لو بيحبوكي فعلا مش هيوافقوا إنك تعملي كده.

5-

ما تسمحيش لحد يستخدم دينك وتعاليمه عشان يحجمك، يعطلك، أو يحبسك جوه صندوق إزاز بتشوفي من جواه الدنيا لكن مش قادرة تتعاملي معاها، ربنا أرحم بيكي من كل واحد شوح في وشك وهو بيقول قال الله وقال الرسول عشان يبخسك حقك أو يوقع عليكي ظلم أو يدفنك بالحياة في سبيل تحقيق مصلحته والتمتع بنزواته.

6-

ما تقسيش على ست زيك وتنصري قواعد المجتمع المجحفة ليها عشان انتي دلوقتي في موضع بعيد عن الأذى، الدواير بتدور وفي يوم هتحتاجيها, ومش هنوصل لأي حاجة طول ما كل واحدة بتدوس على ضهر زميلتها عشان تحوز إعجاب المجتمع الجميل.

7-

ما تعتذريش عن آرائك وأفكارك وتحاولي تقللي من قوتها وتتقمسي دور الكائن الغبي اللي يا دوب خطرتله فكرة واحدة كويسة في حياته كلها، عبري عن أفكارك بقوة وبثقة، العالم لا يحترم الضعفاء.

8-

ما تربيش بنتك زي ما اتربيتي، ما تربيهاش إن مكانها المطبخ، إن قدراتها محدودة، إن تعليمها كل هدفه إنها تاخد شهادة محترمة تتجوز بيها جوازة كويسة يوما ما. 

في يوم المرأة العالمي أتمنى إننا السنة الجاية ما نبقاش مضطرين نفكر نفسنا بكل النصايح دي تاني ونكون حققنا منها ولو جزء يسير، كل سنة وكل امرأة لسه بتحارب الأفكار اللي اتزرعت جواها قبل ما تحارب أفكار الآخرين، كل سنة وهي سعيدة ومتحققة ومتمردة على كل اللي ما بيفيدهاش.

 

غادة عبد العال  

 

 

 

النشرة الإعلاميةأبرز الأحداث الدولية صباح كل يوم

الصفحة غير متوفرة

المحتوى الذي تريدون تصفحه لم يعد في الخدمة أو غير متوفر حاليا.