مدونة اليوم

غادة عبد العال: "هذا الجيل"

سمعي
مونت كارلو الدولية

الأجيال المختلفة بتكون حظوظهم مختلفة .. فيه أجيال بيقضوا فترة شبابهم في هدوء وملل واستقرار .. فيه أجيال بيقضوا فترة شبابهم في فترات تحول ومنعطفات تاريخية .. وفيه أجيال بتقضي حياتها في فترة قلاقل وتحديات .. زي الأجيال اللي عدت بفترة 48 و 67 و 73 و زي الجيل الغلبان اللي بيعدي بالأيام العصيبة اللي إحنا عايشين فيها حاليا ..

إعلان

 

الجيل اللي أنا منه .. جيل مواليد التمانينات ..الجيل اللي قضى العشرينات من حياته في انتظار التغيير ودلوقتي وهو في أواخر العشرينات وأوائل التلاتينات، يبدو إن القطر هيعدي من غير ما يلحق يعيش جزء من شبابه في مناخ نضيف طول عمره بيتمناه و يحلم بيه ..

مدونة وكاتبة مصرية ساخرة تمارس مهنة الصيدلة. بدأت مدونتها "عايزة اتجوز" عام 2006 قبل أن تنشر في كتاب عام 2009 تُرجم إلى لغات عدة عالمية منها الفرنسية وعرض في مسلسل حصل على الجائزة الفضية في مهرجان الإعلام العربي وحصلت عنه عبد العال على جائزة أحسن سيناريو. تكتب منذ 2009 مقالاً ثابتاً في الصحافة المصرية.

فيس بوك اضغط هنا

 
الجيل بتاعنا حالته صعبة قوي في الزمن ده .. إحنا الجيل اللي اتربى يعمل الواجب ويسمع كلام الكبار ويخلص طبقه ويحل الامتحان كله بالأسئلة الاختياري ..
 
إحنا الجيل اللي عمره ما تساءل عن الحالة الاجتماعية بتاعة ميكي وميمي وزيزي وبطوط أو الكيفية اللي أصبح بيها بوجي وطمطم إخوات رغم إن هي أرنبة وهو قرد ..
 
إحنا الجيل اللي كان بيصدق ترجمة أنيس عبيد وإن كل الشتايم معناها " أيها الوغد" و صدق نبيل فاروق إن فيه إنسان زي أدهم صبري ممكن يتشعلق بكل أطرافه في الهوا ويفضل عنده طرف خامس ما يرد على التليفون لما يرن ..
 
إحنا الجيل اللي كان عنده صبر يلعب بنك الحظ بالساعات عشان يوصل لإيه ؟ ما تفهمش .. واللي لسه لغاية دلوقتي مؤمن إنه كان ممكن يلاقي غطا البيبسي اللي عليه الجادون .. واللي فضل يحكي ويتحاكي بالاختراع اللي اسمه " الأتاري" مع إن كل الألعاب اللي عليه كانت عبارة عن شرطتين ونقطة بتتحرك ما بينهم ..
 
 إحنا الجيل اللي كان فتى أحلام بناته "أحمد عبد العزيز" وفتاة أحلام شبابه "حنان شوقي" .. بالذمة فيه جيل راضي بقليله أكتر من كده؟
 
إحنا الجيل الصبور المطيع المهاود محدود الطموحات اللي كان بيرضا بقليله .. الأجواء الثورية دي كتير قوي على أعصابنا وصدمتنا في كل حد على الساحة السياسية بنحاول نثق فيه هيجبلنا أمراض نفسية عن قريب ..
إحنا جيل متعود يصدق ويثق ويسمع الكلام وينفذه .. وعنده استعداد يؤمن ويطيع ويفدي بالروح والدم أي حد كويس يحكمه ..
 
كل اللي بندعي بيه ربنا حاليا إنه يبعتلنا حد كويس .. حد نضيف .. حد محترم بأه في البلد دي عشان نثق فيه .. وإنه ينور بصيرتنا ونختاره ونأيده وما نلفش تاني الدايرة الخايبة بتاعة أنا وراه عشان راجل شديد وأنا وراه عشان بتاع ربنا ..
 
وكل اللي بنحلم بيه إن ربنا يبعتهولنا في أسرع وقت ممكن .. عشان إحنا الموديل بتاعنا ما يستحملش يقعد كتير من غير حد يثق فيه كده.
 
غادة عبد العال

 

الرسالة الإخباريةأبرز الأحداث الدولية صباح كل يوم