تخطي إلى المحتوى الرئيسي
مدونة اليوم

غادة عبد العال: أن تكون "مصري بجد"

سمعي
مونت كارلو الدولية

مصر والمصريين هم أكتر كيانين لعبوا واتلعب بيهم اللعبة الشهيرة "دوخيني يا لمونة" خلال ال 3 سنين اللي فاتوا دول.

إعلان
 
أن تكون "مصري" بجد اليومين دول تستحق جنسيتك المصرية بجدارة، يختلف تمام عن كونك كنت مصري السنة اللي فاتت أو اللي قبلها، كل وقت وله أوان.
 
والجنسية المصرية دي مسئولية، مش لمجرد إن النيل رواك والخير جواك ده يخليك تبقى مصري بجد، إطلاقا، ده شيء له قواعد وأصول بتختلف بين كل فترة والتانية.
 
خليني اديك ملخص سريع، إليك "دليلك للحصول على لقب "مصري بجد" في طبعة 2013 واللي بتختلف تماما عن طبعتي 2011 و 2012 السابقتين.
 
في 2011 كان كونك مصري يستدعي إنك تحسبن ع الشرطة "منهم لله منهم لله ".
 
في 2013 مع سماعك لكل موقعة جديدة بيوقع فيها رصاص الشرطة ضحايا، عليك أن تبدأ فورا في ترديد أغنية "والله وعملوها الرجالة" بدون أي أسئلة عن ملابسات الواقعة أو هوية المقتولين.
 
في 2011 كان الهتاف الشعبي الطاغي "الجيش والشعب إيد واحدة "، في 2013 لا يزال هو الهتاف الأكثر شعبية بعد drop خفيف كده في 2012 اللي كان الهتاف الطاغي فيها "يسقط يسقط حكم العسكر".
 
لكن سبحان من له الدوام، في 2011 قالولنا إن الإخوان كانوا جزء من الثورة، في 2012 قالولنا إن الإخوان خانوا الثورة، في أول 2013 قالولنا إن الإخوان ما كانوش في الثورة أصلا، ثم في منتصف 2013 قالولنا بكل ثقة إن الإخوان هم اللي قاموا بالثورة والثورة أساسا بأه كانت مقلب أمريكاني واحنا شربناه.
 
في 2011 مبارك كان وحش، وحششش ، في 2013 مبارك خرج من السجن ورجعوا حفظونا تاني إسطوانة القضاء الشامخ، واحنا رجعنا فورا حفظناها بدون نقاش.
 
في 2011 عملنا لجان شعبية حماية لنا من البلطجية، في 2013 كان البلطجية جزء لا يتجزأ من خط دفاعنا ضد الإرهاب.
 
في 2011 علقنا جمل من خطب أوباما في مطار القاهرة، في 2013 رفعنا صوره بملابس بن لادن وماسك في إيده آر بي جي أو رشاش.
 
في 2011 كنا بنهلل لثورة سوريا وبنرحب بالسوريين اللي جايين لمصر طالبين الأمان، في 2013 اللي بيقفش سوري ماشي في الشارع بيسلمه تسليم أهالي.
 
في 2011 كان لا عشق يعلو فوق عشق مهند التركي في قلوب المصريات، في 2013 بيفرجونا على مسلسلات كوري عشان ننساه بعد ما أردوغان قل بأصله معانا وأخد جانب الإخوان.
 
الكثير والكثير يا صديقي بيتغير مع الوقت، لو مش مصدق إن شعب بأكمله يغير كل المواقف دي في 3 سنين تبقى ماعدتش على مصر من زمان.
 
إذا عايز تبقى مصري بجد، عليك بحفظ كل المواقف الجديدة دي وحذف اللي قبلها بدون نقاش، مع العلم إن الملخص ده صلاحيته سارية حتى الشهر القادم فقط. بعدها ما أضمنلكش،الله أعلم، هنحب مين ونكره مين، ونقف مع مين ضد مين. الدنيا قلابة يا صاحبي والوقت مالوش أمان .
 
غادة عبد العال
 
*المدونة باللهجة المصرية

 

الصفحة غير متوفرة

المحتوى الذي تريدون تصفحه لم يعد في الخدمة أو غير متوفر حاليا.