تخطي إلى المحتوى الرئيسي
مدونة اليوم

غادة عبد العال: "عزيزي السائح ... تعال"

سمعي
مونت كارلو الدولية

عزيزي السائح، تحذير هام، هذا المقال مخصص لمحاولة جر رجلك وإقناعك بإعادة التفكير في مكان قضاء عطلتك القادمة، وتحويل مسار تذكرة طائرتك السياحية إلى مطار القاهرة.

إعلان

 

أي نعم ، القاهرة، في إطار محاولات الشعب المصري للوقوف مرة تانية على قدميه، ومحاولاتي أنا الشخصية في أن أدل أصدقائي على التجارب اللي لا تفوت، والدال على الخير كفاعله زي ما انتوا عارفين .

مدونة وكاتبة مصرية ساخرة تمارس مهنة الصيدلة. بدأت مدونتها "عايزة اتجوز" عام 2006 قبل أن تنشر في كتاب عام 2009 تُرجم إلى لغات عدة عالمية منها الفرنسية وعرض في مسلسل حصل على الجائزة الفضية في مهرجان الإعلام العربي وحصلت عنه عبد العال على جائزة أحسن سيناريو. تكتب منذ 2009 مقالاً ثابتاً في الصحافة المصرية.

فيس بوك اضغط هنا

 
خلينا نبدأ بنقطة بديهية واضحة ، يقولون عزيزي السائح أن في السفر 7 فوائد ، أما السفر إلى مصر، الآن وليس في أي وقت آخر، ليه من الفوائد ما لا يعد ولا يحصى، مش مصدقني، طب عد معايا:
 
أولا : كل حاجة دلوقتي في مصر أرخص ما يكون، بداية من الأرواح، للدماء ، للشباب، للسلاح، لحياة عائلات كاملة بتتغير تماما بين يوم وليلة بعد ما تفقد أحد الأبناء، الحاجة الوحيدة الغالية حاليا في مصر هي التاكسي، لو زنقت معاك خالص إبقى اركب ميكروباص.
 
ثانيا :كل الأماكن السياحية فاضية تماما، لا طوابير ولا زحام، حبيت تتصور مع الهرم ماشي، تاخد موميا توت عنخ آمون في حضنك ما يضرش، تركب كبش في طريق الكباش أو تاخده في الشنطة وانت مسافر ماحدش هيقولك بتعمل إيه.
 
النصيحة الوحيدة اللي هاقولهالك إن الكاميرا ما تطلعش غير في الأماكن السياحية وجنب الآثار، طلعتها في حتة تانية ما أعرفكش، هيعتبروك بطل مسلسل رأفت الهجان، واحنا لسه ماسكين بطة بتتجسس الأسبوع اللي فات وفضلت تكاكي 3 أيام عشان تثبت إنها بطة، لكن على مين؟
 
ثالثا : مصر مذكورة في القرآن يا أخي إنت هتكفر والا إيه؟ "ادخلوا مصر إن شاء الله آمنين " ... نعم ؟ القنوات التليفزيونية رافعة شعار "مصر تحت الحصار" و "الحرب على الإرهاب"، يا راجل وانت بتاكل م الكلام ده؟ إيه؟ حكومتنا نفسها بتحذر؟
 
يا سيدي ناس مستجدة سياسة، ما يقصدوش يطفشوك، أفندم؟ عربيات مفخخة؟ سلمية، عربيات مفخخة سلمية ما بتعورش، ولو عورت، ما بتعورش غير المصريين، أما الأجانب ع العين الراس، طرف من الأطراف هيحافظ عليكم عشان انتم مصدر دخل أكل عيش، والتاني هيحافظ عليكم عشان يبتزكم عاطفيا فتتعاطفوا مع قضاياه. في الحالتين كل جهة هترمي بواحد منها كدرع بشري عشان يحميكم، بالذمة فيه أكتر من كده أمان .
 
عزيزي السائح : تعال....ماحدش بيموت ناقص عمر،
عزيزي السائح: تعال .. ماحدش عارف يوم مين قبل مين،
عزيزي السائح: .. تعال "وعسى أن تكرهوا شيئا وهو خير لكم" ... إكفر بأه بكلام ربنا، عزيزي السائح تعال بأه، وحشتنا والله العظيم !
 
غادة عبد العال
*المدونة باللهجة المصرية

 

الرسالة الإخباريةأبرز الأحداث الدولية صباح كل يوم

الصفحة غير متوفرة

المحتوى الذي تريدون تصفحه لم يعد في الخدمة أو غير متوفر حاليا.