مدونة اليوم

دستور

سمعي
مونت كارلو الدولية

كعادة بلدنا ، اللي بتنام على موضوع وتصحى على موضوع جديد ، فاضل أيام معدودة وتنام مصر وتصحى على سيرة الدستور الجديد.

إعلان

قبل ما ينتشر الحوار المجتمعي اللي هيطلع القطط الفاطسة في كل مادة وبند، وعشان ما أبقاش قصرت في واجبي تجاه الوطن، دي من رأيي شوية مواد لازم يتم إضافتها في الدستور القادم و إلا مش هنوصل أبدا لمصاف الدول المتقدمة:

مدونة وكاتبة مصرية ساخرة تمارس مهنة الصيدلة. بدأت مدونتها "عايزة اتجوز" عام 2006 قبل أن تنشر في كتاب عام 2009 تُرجم إلى لغات عدة عالمية منها الفرنسية وعرض في مسلسل حصل على الجائزة الفضية في مهرجان الإعلام العربي وحصلت عنه عبد العال على جائزة أحسن سيناريو. تكتب منذ 2009 مقالاً ثابتاً في الصحافة المصرية.

فيس بوك اضغط هنا

 أولا : يتم إلزام كل فرد من الشعب بالتبرع بالدم مرتين في السنة، لنفي العبارة السائدة "ده شعب ما عندوش دم" اللي هي وحشة في حقنا بصراحة وممكن تأثر ع السياحة.

 ثانيا : اللي يمشي عكسي-يركن صف تالت (التاني مالوش حل)-يكسر إشارة ، تتاخد منه عربيته لمدة شهر وتشغلها الحكومة تاكسي يطلع للبلد منه قرشين بدل الحوجة واستجداء القروض من اللي يسوى واللي ما يسواش.
 ثالثا : عقوبة حوادث القطارات هي إعدام وزير المواصلات .. بدون محاكمة أو نقاش.
-المتحرش يتم إخصاؤه .. مش عايزين من العالم دي نسل خلاص
-رمي القمامة في الشارع عقوبته قضاء أسبوع مربوط في عمود بجوار نفس ذات كوم الزبالة وبعدها يقوم الجاني برفع الكوم الزبالة من الوضع زاحفا، لازم يبقى في المستوى اللي يناسبه.
- يتم إلزام جميع الأميين بحضور دروس محو الأمية، ومن لا يثبت محو أميته في خلال عام يتم ترحيله من البلاد إلى أي بلد ما ترضاش تدينا قروض.. هيجيبوها ورا في ٣ شهور .. يستاهلوا
-عقوبة التدخين في المواصلات العامة هي الحجز لمدة أسبوع في عنبر الحالات المعدية الخطرة في أقرب مستشفى حميات .. الجزاء من جنس العمل يا صاحبي .. مالهاش جزاء تاني.
-إلغاء جميع الميكروباصات والتكاتك وتوفير دراجات لجميع أفراد الشعب الغير قادرين على شراء سيارة .. طب والنبي يبقى شكلنا تحفة، تخيل أم محمد بتاعة الجرجير راكبة عجلة كده ؟ .. عسل !
 
دي بعضا من اقتراحاتي لقوانين حاسمة عشان احنا اتدلعنا كتير، هنا خد الدنيا كلها دلع و الا إيه ؟  وبالمناسبة أنا ممكن أتنازل وارشح نفسي لرئاسة الجمهورية عشان أساعدهم على التنفيذ، إدعوا بس إن الدستور ده يعيش أكتر من السنة اللي بقت العمر الافتراضي لأي دستور، وكل دستور وانتم طيبين .
 
غادة عبد العال
 
*المدونة باللغة العامية*
 
 

 

الرسالة الإخباريةأبرز الأحداث الدولية صباح كل يوم