تخطي إلى المحتوى الرئيسي
مدونة اليوم

دستور 2014 .. رقصا إليك

سمعي
مونت كارلو الدولية

إن كنت من ساكني هذا الجزء المثير من الكرة الأرضية فأنت بالتأكيد سمعت عن الدستور المصري السوبر اللي تم إقراره الأسبوع ده في مصر المحروسة من النق و الحسد ..

إعلان

مدونة وكاتبة مصرية ساخرة تمارس مهنة الصيدلة. بدأت مدونتها "عايزة اتجوز" عام 2006 قبل أن تنشر في كتاب عام 2009 تُرجم إلى لغات عدة عالمية منها الفرنسية وعرض في مسلسل حصل على الجائزة الفضية في مهرجان الإعلام العربي وحصلت عنه عبد العال على جائزة أحسن سيناريو. تكتب منذ 2009 مقالاً ثابتاً في الصحافة المصرية.

فيس بوك اضغط هنا

وجوه سوبرة الدستور و الاستفتاء عليه كتيره .. منها إنه أول دستور أو استفتاء أو انتخابات في مصر تتعدى نتيجت ال90  %من زمان .. يعني احنا كنا اتعودنا على فشلنا الذريع في كل انتخاباتنا الخايبة اللي عمر ما مجموعها عدى أبدا التمانينات ..
 
من الستينات ما سمعناش عن النسب التسعينية اللي بتؤهل دستورنا الجديد إنه يدخل طب بشري جامعة عين شمس و هو حاطط رجل على رجل .. صحيح لسه ما كسرناش نسبة ال99.9  %اللوذعية اللي حققها الاستفتاء على جمال عبد الناصر رئيسا زمان ..لكن الكل واثق إنه بشوية مذاكرة صغيرين و جد و اجتهاد أكبر من الحشد الإعلامي و المجتمعي للشعب المهاود اللي بيستحرم يقول أي حاجة غير نعم ..
 
هنوصل للنسبة دي و نعديها في انتخابات الرئاسة الجاية .. بل هنتخطاها بسهولة شديدة و يمكن ننتخب رئيس مصر القادم ب 104%  .. و بكره تشوفوا مصر .. وجه تاني من وجوه تميز الدستور هو المرحلة السنية للمستفتين عليه ..
 
دور على أي فيديو أو صورة لأي طابور في أي مكان مش هتلاقي غير الشباب الواعد من عمر 65 سنة فأكبر واقف متحمل الصعاب عشان يستفتي على دستور يضمنله مستقبله و يساعده يكون نفسه و ينطلق نحو آفاق لم ينطلق لها أحد من قبل .. كل الشباب السبعيناتي ده هينطلق في خلال الكام سنة الجايين للنجاح .. للتفوق .. ..
 
وللرفيق الأعلى ليشهدوه على مستقبل مصر اللي ضمنوه بالتصويت بنعم على دستور حبوب لسلطة حبوبة فاضت بالحب ع المصريين في كل مكان مما أدى لوجه التميز الأخير و الأبرز في دستور 2014 المجيد و هو الاستفتاء رقصا .. ذلك التقليد الجديد اللي ابتكره المصرين في الاستفتاء المرة دي .. الاستفتاء المكون من 3 مراحل .. يدلي المواطن بصوته .. يتصور بصباعه الملغمط بالحبر الفسفوري.. و بعدين لسبب مجهول يتحزم و ينزل رقص ..
 
هل شفت في أي مكان الاحتفاء ده بأي مرحلة ديمقراطية سياسية في أي مكان في العالم .. هل شفت هذا التعبير العفوي عن الحب في أي لجنة في أي دولة من الدول العالم المتقدمة .. هل شفت تلك الكمية من المواهب في أي طابور و لا حتى طابور so you think you can dance مثلا ؟ ..
 
المصريين في هذا الاستفتاء السوبر أثبتوا تفوقهم الإنساني على كل شعوب العالم في يومين اتنين .. في أي مكان في العالم ممكن يحصل استفتاء .. في أي مكان ممكن تكون نتايج الاستفتاء فوق التسعين في الماية .. لكن هل عمرك شفت أي شعب في العالم يستفتي رقصا ؟ .. أهي دي اللي عمرها ما حصلت و لا هتحصل إلا في مصر .. و بكره تشوفوا مصر !
 
غادة عبد العال

هذه الصفحة غير متوفرة

يبدو أن خطأ قد وقع من قبلنا يمنع الوصول إلى الصفحة. نعمل على حل هذه المشكلة في أقرب وقت ممكن