في إطار احتفالات العالم بيوم المرأة العالمي الأسبوع الماضي، وهو يوم ما برتبطش في العادة بمشاعر سعادة وزأططة على أد ما بيكون يوم ملائم لتقليب المواجع مش أكتر، إليك عزيزتي المرأة الشرقية اللي ربنا عاقبك بأنك تتولدي في هذه البقعة الحزينة من العالم لسبب لا يعلمه إلا هو سبحانه وتعالى، إليك الدليل الشافي الوافي لأسهل الخطوات اللي ممكن تعمليها عشان ما تتمش معاقبتك في مجتمعاتنا اللذيذة على جريمة كونك اتولدت امرأة:
1- حاولي تتحاشي إنك تدلي برأي في أي موضوع أو إنك تردّي على أي سؤال بجمل أو كلمات مفهومة .. كل اللي عليك إنك تعمليه إنك تضحكي أكتر ضحكة بلهاء تقدري تضحكيها، أو تبتسمي ابتسامة ساحرة أو تخلي وشك يحمر. تقدري على فكرة تبقي أستاذة في إنك تخلي وشك يحمرّ عند الطلب بالتدرب عدة مئات من المرات قدام المراية.
مدونة وكاتبة مصرية ساخرة تمارس مهنة الصيدلة. بدأت مدونتها "عايزة اتجوز" عام 2006 قبل أن تنشر في كتاب عام 2009 تُرجم إلى لغات عدة عالمية منها الفرنسية وعرض في مسلسل حصل على الجائزة الفضية في مهرجان الإعلام العربي وحصلت عنه عبد العال على جائزة أحسن سيناريو. تكتب منذ 2009 مقالاً ثابتاً في الصحافة المصرية.
فيس بوك اضغط هنا
2-حاولي ما توحيش لأي حد إنك عندك أي خطط مستقبلية أو آمال للمستقبل أو إنك خطر في يوم على بالك أي طموحات في دراسة أو عمل، كل طموحاتك لازم تتعلق بشكل فتى أحلامك ونوع فستان فرحك وأسامي أولادك المستقبلين وطرق طبيخ مختلفة ومتميزة، عشان ما تشعريش اي حد من عيلتك بالملل ولا شيء غير ذلك، وبكده هتبقي في عيون المجتمع فله شمعة منورة.
3- يمكنك وضع شوية مجهود زيادة في التفكير في طرق تكوني بيها أقل إزعاجا للمجتمع اللي انتي عايشة فيه، أظن إنك عارفة إن الكل بيلومك على وجودك في الحياة والقيام بأشياء مستفزة زي إنك تمشي في الشارع، وهو الشيء اللي بيشتت انتباه كل الرجالة وبيضطرهم آسفين انهم يتحرشوا بيكي عشان يتخلصوا من تشتيتك لهم ويلتفتوا باه لدورهم العظيم في بناء ورفعة المجتمع. فليه ما تحاوليش تفكري وتطلعي بحلول عملية زي إنك تتوصلي لاختراع طاقية الاخفاء أو تخلصي في الدعاء يمكن ربنا يحولك ذبابة عند اللزوم فما تشغليش حيز كبير من الفراغ و تريحي وتستريحي.
4- أما إذا كنتي عايزة تلاقي حل جذري يمكنك من إنك تعيشي حياتك بسلام بدون ضغوطات، بدون إزعاج، بدون إحساس بالذنب بيحملهولك المجتمع كله فقط لكونك امرأة، فيمكنك عزيزتي بمنتهى البساطة انك تتوقفي عن كونك امراة، ممكن ببساطة تدوري على شغلانة كويسة تحوشي شوية فلوس كتير وتعملي عملية تغيير جنس، وبكده كلنا وكلهم هنرتاح ، أيوة.
نصيحتي الأهم في يوم المرأة العالمي عزيزتي المرأة العربية أو الشرقية ليه تديهم فرصة يعاملوكي كمواطن درجة تالتة وليه تقعدي تسمعيهم وهم بينصبوكي في مرتبة اشر من الشيطان الرجيم.
وليه تقفي عاجزة وهم بيطلعوا عقدهم النفسية والعاطفية والجنسية عليكي. ليه تستحملي وليه تسكتي وليه لازم ما تعترضيش عشان تباني محترمة ومتربية وبنت ناس.
لو مش قادرة تعترضي صدقيني مافيش حل غير كده من اجل ترييح الدماغ، من اجل العيش بأمان، من اجل إن تكوني أكثر راحة وثقة وسعادة.
نصيحتي ليكي عزيزتي المرأة في يوم المرأة العالمي، خليكي راجل.
غادة عبد العال
* المدونة باللغة العامية"
