مدونة اليوم

غادة عبد العال: "كيف تكون "عربياً" جداً؟"

سمعي
مونت كارلو الدولية

وقت طفولتي ومراهقتي كان في أيام كتير جداً بتعدي عليا باتساءل فيا: يا ترى أنا إزاي محظوظة كده؟ ربنا خلقني في أعظم دولة في العالم، في أحسن جزء في العالم، وعايشة في أحسن طقس، تحت أحلى شمس وباشرب أحسن ماية من أنضف نهر، وعايشة في وسط دول بيحبوا ويحترموا ويقدروا بعض ومتماسكين كالبنيان المرصوص.

إعلان

مدونة وكاتبة مصرية ساخرة تمارس مهنة الصيدلة. بدأت مدونتها "عايزة اتجوز" عام 2006 قبل أن تنشر في كتاب عام 2009 تُرجم إلى لغات عدة عالمية منها الفرنسية وعرض في مسلسل حصل على الجائزة الفضية في مهرجان الإعلام العربي وحصلت عنه عبد العال على جائزة أحسن سيناريو. تكتب منذ 2009 مقالاً ثابتاً في الصحافة المصرية.

فيس بوك اضغط هنا

 بعد شوية كبرت وعرفت أد إيه كنت بريئة وساذجة وأنا صغيرة. عرفت الحقيقة المرة وكالعادة كتمتها جوه قلبي واستمريت أقول لأصحابي الغربيين أد إي أنا لسه حاسة إني محظوظة وأد إيه ماعنديش أي رغبة إني أسيب البلد والمنطقة والقارة دي وأعيش في أي مكان تاني.

الكلام ده كان فعلا بيخيل على كل أصحابي من الدول الغربية ياي المتقدمة لحد ما دخلت في مناقشة من وقت قريب مع واحدة منهم قضت بالفعل وقت في عالمنا العربي الجميل وإذ بيها بتديني لستة بمواصفات كل واحد عربي قابلته في حياتها تحت عنوان "كيف تكون "عربي" جداً؟" والنقط اللي فيها كما يلي:

1- نكد كل ما تقدر تنكد، ما تاخدش أي حاجة بشكل مسلم بيه من غير ما تتذمر، طول ما انت ماشي تقول، إيه العربية المقرفة دي ن إيه الطريق البايظ ده، إيه الشجر المعوق ده ، إشتكي من كل حاجة وأي حاجة هتكون بكده عربي حقيقي جداً.
2- ما تقولش على حاجة ما اعرفش، لو حد سألك عن عنوان ما تعرفوش قول هم قالولك فين لو حد سألك إذا كنت بتعرف تعمل شغلانة محددة قوله آه وجرب مش يمكن تطلع بتعرف؟
3- إجاباتك على كل الأسئلة لازم تكون بـ3 كلمات "إن شاء الله" ودي الإجابة المعتمدة لكل الأسئلة والطلبات هتعملها بأه أو مش هتعملها دي مش مسئوليتك. اللي قدامك هو اللي المفروض يفرق بين "إن شاء الله" اللي معناها إنك هتعمل و"إن شاء الله" اللي معناها إنك مش هتعمل حاجة.
4- لازم تعرف وتآمن إن كل حاجة حلها الفلوس، لو كان معايا فلوس ما كنتش سرقت ن لو كان معاه فلوس ما كانش تحرش، لو كان معاهم فلوس ما كانوش يضحكوا بصوت عالي كده. وآمن كمان إن أي مشكلة تحصلك تتحل بالفلوس، يعني حتى لو دهست واحد في الشارع بعربيتك إسأل أهله عايزين كام وافلت من العقاب بكل سهولة، سلو بلادنا كده.
5- ليه تقول لحد معلومة صحيحة لما ممكن تقوله معلومة غلط وتتوههه؟ مش يمكن ياخد المعلومة الصحيحة دي ويضرك بيها؟ مش يمكن لما تديله معلومة غلط يقع وتاخد مكانه؟
6- إوعى تعتذر، الاعتذار ده للناس الخيخة الخايبين لكن انت راجل عربي أصيل، مايصحش تعتذر.
7- كل الناس كفرة إلا انت. كل الناس هتدخل النار وانت الوحيد اللي هتقفل باب الجنة وراك وانت داخل، حتى لو حرامي، فاسد، مغتصب، قاتل، فأكيد ربنا بيعتبرك الشخص المفضل ليه على وجه الخليقة. معروفة طبعا مش محتاجة شرح ، صديقتي تخيلت إنها كده بتحرجني يعني، لكن اللي عصبها فعلا لما قلتلها بعد ما خلصت كلام إن كل كلامها ده أصلا يدعونا للفخر مش الكسوف ولا الخجل، سكتت هي وانهزمت وأنا طبعا انتصرت، أصلي أتمتع بصفة عربية أصيلة بتخليني أفخر إني عربية جدا وهي إني دايما بادفن راسي في الرمل وعمري ما أعترف أبدا إني غلطت .

غادة عبد العال
"هذه المدونة باللغة العامية"

الرسالة الإخباريةأبرز الأحداث الدولية صباح كل يوم