تخطي إلى المحتوى الرئيسي
مدونة اليوم

غادة عبد العال: "دلع عيني دلع"

سمعي
مونت كارلو الدولية

"دلع عيني دلع.. دلع روحي دلع" أغنية كاظم الساهر اللي تستحق تكون النشيد الوطني لحياتنا كلنا. إحنا شعوب عندها حساسية مفرطة تجاه مفهوم "المسؤولية" وبتتهرب منها بخليط من "الطناش" و"الدلع" فحياتك كمواطن عربي تعيش في هذه البقعة المثيرة للدهشة من العالم بتبدأ بالسيدة والدتك وهي بتلتمسلك العذر عن كل الجرايم اللي يسمحلك سنك انك ترتكبها في العمر ده.

إعلان

مدونة وكاتبة مصرية ساخرة تمارس مهنة الصيدلة. بدأت مدونتها "عايزة اتجوز" عام 2006 قبل أن تنشر في كتاب عام 2009 تُرجم إلى لغات عدة عالمية منها الفرنسية وعرض في مسلسل حصل على الجائزة الفضية في مهرجان الإعلام العربي وحصلت عنه عبد العال على جائزة أحسن سيناريو. تكتب منذ 2009 مقالاً ثابتاً في الصحافة المصرية.

فيس بوك اضغط هنا

 كسرت لعبتك "ده عيل وبيلعب"، رزعت سلطانية الكوسة في الحيطة "ده عيل وبيلعب"، روحت عند حد وقعدت تتنطط ع الكنب وتشد في الستاير وكسرت نص الأنتيكات اللي في النيش اللي العريس هيفضل يسدد في تمنها لحد العقد الخامس من عمره "ده عيل وبيلعب"، حتى لما تفيت على عمو. هم اللي علموك أنا فاهمة إن ده مش ذنبك بس بيتنصلوا برضه من المسؤولية وبيقولوا "عيل وبيلعب".

بمزيج من التقريرية والدلع بتفلت من أي عقاب وانت عيل وبتلعب وبتنتقل معاك الأعذار لمستوى جديد زي ما بتنتقل جرايمك لمستوي جديد بتنتقل بأه لمرحلة "ده شاب وكل الشباب كده". تهمل في مذاكرتك تشرب سجاير تقف جنب الكشك اللي على ناصية شارعكم تخمس مع صحابك في مقاطع بلوتوث ساخنة تعاكس بنت الجيران... كل الجرايم دي بتفلت منها بمزيد من دلع الست والدتك والسيد والدك وبقية أفراد العيلة والجيران ليك واحتماء بالجملة السحرية "ده شاب وكل الشباب كده ".

بتدخل بعد كده لمرحلة "ده راجل برضه وفي رقبته كوم عيال" تختلس من عهدتك أو تاخد رشوة ماحدش يفضحك عشان انت راجل وفي رقبتك كوم عيال تضرب رسالة دكتوراة مزورة يتكسفوا يواجهوك عشان انت راجل وفي رقبتك كوم عيال تتحرش بواحدة في أتوبيس تيجي ترفع صوتها تلاقي الكل سكها "خلاص يا آنسة ما توديهوش في داهية ده راجل وفي رقبته كوم عيال"، ولوربنا كرمك ومسكت منصب مهم أو مش مهم قوي تبتدي أعذار تانية من عينة "وهو هيعمل إيه يعني وهوده مرتب؟ ماهو لازم يعمل كده" أو"على قد فلوسهم" وهوهيقطع نفسه يعني! أو وهو يعني هو لوحده اللي بيسرق ما كلهم بيسرقوا، أو خلاص بأه ما تقلبوش في الماضي إرحموا عزيز قوم ذل أو وهو ماله؟ دي التركة القديمة، أو ياسلام؟! وهو هو اللي ماسك سكينة الكهربا يعني؟ أو حرام عليكم هيجيبلكم منين؟ هو مش قادر مش عايز هتاكلوا البلد يعني؟

وتفضل سيادتك متدلع ومتبغدد ولا يمكن تشيل مسؤولية أي خطأ من أخطاءك ولا يمكن تشيل هم أي من تقصيرك أو سقطاتك طول ما انت مشرفنا ومآنسنا وعايش معانا هنا. بالذمة فيه دلع أكتر من كده في أي حتة في العالم؟ وحد يلاقي الدلع ده كله وما يتدلعش؟ لنا الله وحسبي الله ونعم الوكيل، ولا حول ولا قوة إلا بالله!

غادة عبد العال

*المدونة باللغة العامية*

الرسالة الإخباريةأبرز الأحداث الدولية صباح كل يوم

الصفحة غير متوفرة

المحتوى الذي تريدون تصفحه لم يعد في الخدمة أو غير متوفر حاليا.