تخطي إلى المحتوى الرئيسي
مدونة اليوم

غادة عبد العال: "ذاكرة السمكة"

سمعي
مونت كارلو الدولية

حسني مبارك طلع براءة؟! آه والله طلع براءة.. وحياة الأخوة طلع براءة. آه المحاكمة اللي من أسبوع دي.. لسه فاكر؟ آه يا عم لسه فاكر. هو كان حصل إيه بعدها نسانا محاكمة مبارك؟ فيه حادثة كانت في الإمارات باين؟

إعلان

مدونة وكاتبة مصرية ساخرة تمارس مهنة الصيدلة. بدأت مدونتها "عايزة اتجوز" عام 2006 قبل أن تنشر في كتاب عام 2009 تُرجم إلى لغات عدة عالمية منها الفرنسية وعرض في مسلسل حصل على الجائزة الفضية في مهرجان الإعلام العربي وحصلت عنه عبد العال على جائزة أحسن سيناريو. تكتب منذ 2009 مقالاً ثابتاً في الصحافة المصرية.

فيس بوك اضغط هنا

بعدين فيه تسريبات لتسجيلات من جوه مكتب المجلس العسكري، وبعدين فيه ناس طلعت تقول إنها مفبركة، وبعدين كان فيه إشاعة إن مبارك مات، وبعدين فيه حادثة تحرش قلبت بانتحار على ما أتذكر وكان فيه ماتش للأهلي باين ومش فاكر الحقيقة حصل إيه بعدها.

بس انت فاكر إن مبارك طلع براءة. آه تقريبا ،، طشاش كده. حكاية كل يوم وكل أسبوع وكل شهر. يقال دائما على لسان العالمين ببواطن الأمور إن الذاكرة العربية الشعبية تاريخ صلاحيتها ينتهي بعد ٣ أيام.

أي حدث بينفجر على ألسنتنا وفي تغريداتنا واستيتاساتنا على مواقع التناحر الاجتماعي وكأنه نهر بيقتحم سد منيع ،. آلاف التعليقات والمقارنات والمناقشات والمشاحنات لمدة ٣ أيام بالتمام والكمال.

وبعدين. هششششش. مافيش. أي تكملة للخبر اللي انفجر في وعينا ده أو نتيجة ليه أو حتى ذكرى بتختفي من رادارنا تماما ونبتدي نمسك في حدث جديد.

لا بنهتم نوصل لقفلة للحدث الأولاني ولا حتى بنفتكر بدايته كانت ازاي. الناس بره لسه كل كام سنة يعيدوا اختبار نظريات لاختفاء طيارة وقت الحرب العالمية التانية أو لمقتل رئيس في الستينات تاني، أو لحادثة انفجار صاروخ فضائي في التمانينات، وبيحاولوا بكل جهدهم يفهموا الأسباب إيه عشان ما يقعوش تاني في نفس المشكلة.

أما إحنا فاحنا الشعوب اللي دايما تنتبه مثلا على حادثة قطر يروح ضحيتها عشرات أو مئات. وتفضل تهري لمدة ٣ أيام في مين السبب وبعدين تنسى. لا بتحضر لحظة القبض على الفاعل ولا محاكمته ولا حتى نتيجة التحقيقات للوصول لسبب الحادث. وتنام سنة إتنين عشان تصحى على حادثة قطر تانية، ونعيد الدايرة من الأول وبرضه ما نوصلش لآخرها إيه.

إحنا الشعوب اللي بتنتخب فاسد ورا فاسد وتدافع عنه باستماتة. وينولها منه آلام وأحزان وبعد ما ربنا ينقذها منه بقدرة إلهية. بتدوّر على صورة طبق الأصل منه لأنها بتبقى للأسف نست خلاص اللي عمله الفاسد اللي فات.

إحنا الشعوب اللي بتنسى الدم على الأرض قبل ما ينشف. وتعدي وهي بتتساءل. عصير الفراولة اللي ع الأرض ده جه منين.

إحنا الشعوب اللي بتتقرص من جحر واحد عشرات المرات ولا زالت مقتنعة إنها مؤمنة بطبعها. لأنها ما بتهتمش تفهم الحاضر ولا تستخلص دروس من الماضي.

كل اللي يهمها إنها تبقى زي ما قال مؤخرا صحفي شهير. تعيش حياة الدولفين. كل اللي يرميلها كورة في الهوا تنط وراها. و لا تزهق ولا تمل من كتر الكور والتنطيط. بدون ما تفكر هي بتنط ليه؟.

ومين اللي بيحدف الكورة. وممكن إزاي تستفيد من الكورة أو تتحاشى إنها تفضل زي العبيطة كل شوية تنط في الهوا وتنزل على مافيش.

أعزائي الإخوة والأخوات أصحاب ذاكرة السمكة. شوية تركيز وشوية احترام للتاريخ وللحظة الحالية. وشوية انتباه للي حصل واللي بيحصل. لأننا لو ما ركزناش في أسباب أخطاء الماضي وما استخلصناش الدروس من اللي بيحصل لنا في الحاضر. أكيد مستقبلنا هيبقى مافيش!

*هذه المدونة باللغة العامية*
غادة عبد العال
هذه الصفحة غير متوفرة

يبدو أن خطأ قد وقع من قبلنا يمنع الوصول إلى الصفحة. نعمل على حل هذه المشكلة في أقرب وقت ممكن