تخطي إلى المحتوى الرئيسي
مدونة اليوم

غادة عبد العال: "يوم للمرأة"

سمعي
مونت كارلو الدولية

بما إننا شعوب لطيفة ومحبة للمرح ومبتسمة للحياة .. فتلاقي في منطقتنا العربية إن ناسها ما يحبوش يفوتوا أي مناسبة إلا لما يحتفلوا بيها .. راس السنة ماشي .. الهالويين ما يضرش .. الفالانتاين بأه من الأساسيات .. الأسبوع ده مثلا كان العالم بيحتفل باليوم العالمي للمرأة واحنا كالعادة شبطنا في اليوم وحلفنا ميت يمين لاحنا محتفلين احنا كمان..

إعلان

 

 

رغم إن الاحتفال بعيد المرأة في منطقة تعتبر حزام كوارث بالنسبة لأي امرأة شيء يثير الاستغراب..
 

مدونة وكاتبة مصرية ساخرة تمارس مهنة الصيدلة. بدأت مدونتها "عايزة اتجوز" عام 2006 قبل أن تنشر في كتاب عام 2009 تُرجم إلى لغات عدة عالمية منها الفرنسية وعرض في مسلسل حصل على الجائزة الفضية في مهرجان الإعلام العربي وحصلت عنه عبد العال على جائزة أحسن سيناريو. تكتب منذ 2009 مقالاً ثابتاً في الصحافة المصرية.

فيس بوك اضغط هنا

لكن اللي يثير الاستغراب أكتر إن أول من يدعو للاحتفال بيوم المرأة في عالمنا العربي هو برضه أول يمتهن المرأة وهو المرأة ذاتها ..
 
اللي قبل ما تمتهن زميلة أو صديقة أو بنت أو حتى أم .. بتصرفاتها وحكمها القاسي على بنات جنسها، فهي أولا وأخيرا بتمتهن نفسها بشكل أساسي بسبب بذرة الشعور بالدونية اللي زرعها جواها المجتمع واللي تولت هي بعد كده سقايتها ورعايتها لحد ما بقت شجرة طويلة مزهزهة..
 
خليني مثلا آخد من حياتك يا أختي العزيزة بعض نماذج بتوضح شعورك تجاه نفسك بالنقص والدونية واقتراحي لكيفية التعامل معاها :
١- الموضوع : نفسي أقص شعري بس جوزي بيحب الشعر الطويل .. الإجابة : يولع على فكرة .. وما أقصدش شعرك !
٢- الموضوع :أصله ما بيحبينيش أروح بيت ماما كتير ..الإجابة : يتفلق على فكرة .. وما أقصدش بيت ماما !
٣-أصله قاللي ما أعرفش دعاء تاني عشان ما بيحبش أسلوب لبسها..يتحرق بجاز على فكرة .. وما أقصدش لبس دعاء !
٤-أصله أخد مني باسوورد الفيسبوك وبيدخل عليه يقرا رسايل الإنبوكس كل يوم .. يتفجر بقنبلة على شريط قطر ويكمل القطر على بقيته ما يعرفوا يلموه قادر يا كريم .. وأكيد ما أقصدش الإنبوكس !
٥-أصله قاللي بلاش جراحة وخدي رمد .. وخلاني أحول الوحدة الصحية اللي جنب البيت عشان أسهل وهتخليني ألحق أسخنله الغدا بدل المستشفى النموذجية البعيدة اللي هناك .. ولما هو عايز ست بيت تسخنله الغدا .. كان بيتجوزك دكتورة ليه ؟! .. ولما انتي مش أد الطب .. بتقرفينا وتاخدي مكان واحد والا واحدة يستحقوا ليه ؟
 
أختي.. خلينا نتفق أولا بمناسبة اليوم المفترج ده على حاجات أساسية إنتي فاهماها غلط :
 
*أولا : لازم حضرتك تبدأي تؤمني بأه إن من المفترض إنك تبقي صاحبة الرأي الأول والأخير فيما يخص جسم سيادتك.. وفي تحديد حاضرك ومستقبلك .. دي حاجات شخصية مش عائلية.. إلا في حال احتجتي مشورة شريكك في الحياة أو حد من عيلتك مش أكتر من كده...
 
*ثانيا : لازم برضه حضرتك تحاولي تقنعي نفسك أو تفكري نفسك إن ربنا خلقك لغرض ..
وإن الغرض ده لو كان مجرد إنك تخلفي في عيال مش كان يبقى أسهل لو ربنا خلقك بقرة .. تولد وتتحلب وقت اللزوم وشكرا وألف ألف مبروك؟
 
*ثالثا :إنتي مش مكملة لحياة حد. إنتي بني آدم مستقل.. خلصينا من نغمة "البنت مش زي الولد " دي .. سعاد حسني زمانها بتتقلب في تربتها يا شيخة من كتر ما صوتها اتنبح!
 
كونك بتريحي دماغك وترمي مسئولية الإنجاز عليه وتفضلي تستفيدي بالمترتب على إنجازاته.. ده غالبا عشان بتستحلي دور ضحية المجتمع .. 
 
ولو بصيتي حواليكي هتلاقي بنات وستات كتير ناجحين وبينجحوا وليهم شخصية وطريق وهدف.
 
أختي .. أنفضي عنك سنين الكسل والاستسهال .. والشعور بالدونية .. وعشق قلة القيمة.. واكبري كده واعقلي.. بدل ما انتي عايشة عالة ع الكوكب وزحمالنا الدنيا وخلاص!
 
وكل عام وأنتم بخير .. ووفقنا الله وإياكم لما فيه خير للجميع!
غادة عبد العال
*هذه المدونة باللغة العامية*
 
 

 

هذه الصفحة غير متوفرة

يبدو أن خطأ قد وقع من قبلنا يمنع الوصول إلى الصفحة. نعمل على حل هذه المشكلة في أقرب وقت ممكن