تخطي إلى المحتوى الرئيسي
مدونة اليوم

غادة عبد العال: "الحجاب الحجاب"

سمعي
مونت كارلو الدولية

خرج أحد المثقفين المصريين في وسائل الإعلام المختلفة الأسبوع اللي فات يدعو لمليونية في ميدان التحرير خاصة بالنساء المحجبات اللي عايزين يخلعوا حجابهم، فقامت الدنيا ولسه ما قعدتش وشكلها مش هتقعد قريب، الحقيقة.

إعلان

 ردود أفعال مساندة للدعوة تطالب بمزيد من التحرر، وردود أفعال مناهضة شايفة الدعوة حرب صريحة على الإسلام، بس لو بعدنا شوية عن المناوشات المعتادة المتعلقة بموضوع الحجاب، هنلاقي زي كل مرة إن ٩٠٪ من المشاركين في هذا الجدال عن الحجاب باستثناءات بسيطة من معشر الرجال، لا تخرج قبل أن تقول سبحان الله يا أخي، يظن معظم الرجال في وطننا العربي الجميل إن المرأة منزلتها من منزلة الحيوان الأليف، كائن جميل ولطيف لكنه هش وضحل، لا يقدر يتحمل مسئولية إتخاذ قرار ولو ما اتحطلوش حدود وقواعد هيشت ويتوه وممكن يضل وينحرف.

 

مدونة وكاتبة مصرية ساخرة تمارس مهنة الصيدلة. بدأت مدونتها "عايزة اتجوز" عام 2006 قبل أن تنشر في كتاب عام 2009 تُرجم إلى لغات عدة عالمية منها الفرنسية وعرض في مسلسل حصل على الجائزة الفضية في مهرجان الإعلام العربي وحصلت عنه عبد العال على جائزة أحسن سيناريو. تكتب منذ 2009 مقالاً ثابتاً في الصحافة المصرية.

فيس بوك اضغط هنا

فكرة إن فيه واحدة ست قادرة على إنها تختار لنفسها الزي اللي تلبسه شيء مستغرب ومستهجن في معظم مجتماعتنا العربية، ولما تناقش حد معترض ع الفكرة دي، بيشغل دايما الاسطوانة المحفوظة "كلكم راع وكلكم مسئول عن رعيته ".  
 
بينسى هؤلاء المتشدقين بالآيات الدينية دون تحري لمعانيها إن ربنا قال " كلكم راع" .. “كلكم" .. يعني تشمل الرجال والنساء وماحددش شكل الرعاية إيه بالظبط ..
 
وفيه آراء كتير بتشرح الرعاية على إنها توفير احتياجات الأسرة والوقوف على خدمة أفرادها مش حمل مفتاح القفل اللي قافل على سلاسلهم اللي راعيهم مكتفهم بيها، وإلا لو كان الأمر مجرد تحكمات وبما إن مراتك هي كمان راعية ومسئولة عن رعيتها ومشافتك بتشرب سجاير مثلا (وفيه فتوى بالمناسبة بتقول إنها حرام) مش يبقى من حقها تمنعك عنها بإنها تحلف عليك مثلا ما تنزلش الشارع إلا لما تبطل تدخين يا إما هتحرمك من أصحابك ومن الشغل ومن إنك تشوف نور الشمس عامة .. والا انت ساعتها هتشوف إن دي وقاحة وإن آخرها معاك إنها تنصحك ومالهاش عندك أكتر من كده؟  
 
أما عن نظرية إن الرجل محاسب عن أهل بيته وهيشيل من ذنوبهم وهو اللي بيتنافى تماما مع قول الله تعالى " ولا تزر وازرة وزر أخرى" مفل لو انت ما بتصليش .. هي كمان تتحاسب عن عدم صلاتك؟ .. هل لو انت بدأت تشرب خمرة .. هل هي في الحالة دي هتاخد ذنوب؟   
 
عزيزي الرجل اللي حاشر مناخيره في مليون حاجة مالوش أي علاقة بيها .. وهو أصلا مقصر في حياته كلها! .. ما لكش دعوة بالحجاب .. لا تقول البسوه ولا تقول إقلعوه .. لو الحجاب  أمر من ربنا فهو أمر للستات .. ولو اختيار شخصي فهو اختيار الستات .. إخلع انت منها وخليك في الحاجات اللي تهمك .. حكم اللحية .. أسباب التعدد.. وعدد حور العين اللي منتظرينك في الجنة إن شاء الله .. أما رؤوسنا فسيبهالنا إحنا قادرين على إننا نفكر ونقرر نعمل فيها إيه بالظبط من غير وصاية من حضرتك.
 
غادة عبد العال
*هذه المدونة باللغة العامية*

 

هذه الصفحة غير متوفرة

يبدو أن خطأ قد وقع من قبلنا يمنع الوصول إلى الصفحة. نعمل على حل هذه المشكلة في أقرب وقت ممكن