عروب صبح: "مش فاهمة ليش؟"

سمعي
مونت كارلو الدولية

الناس بتطلع من صف السيارات الواقف على الإشارة وبتتجاوز كل الناس اللي واقفة بتنتظر!!! يا ترى ليش؟ هم وقتهم اهم؟يمكن بفكروا أنهم أهم! شو بيخطر ببالهم وليش؟كثير مرات بكون جاي عبالي الحقهم وأقطع الطريق عليهم زي فاست اند فيوريس وأسألهم ليش بعملوا هيك؟

إعلان

 

مهندس الصوت اللي سجل صوت أليسا ما زبط حرف التاء في(موتني) ليش ليش طيب مهو زبط كل شي ثاني ... وقفت على هاي؟!
 
الناس اللي بتركب موجة شخص .. سياسي, فنان, شيخ أو حاوي ... ليش بمارسوا عبوديتهم على الطريقة الوثنية؟ ليش ما يلاقوا طريقة جديدة أقل ابتذالا ليش؟
 
ليش في بلادنا لسه الشاب اللي واقف على الطريق مع صحابه بتحرش بسيدة أو صبية بكلمة أو حركة ! من كل عقله بفكرها رجولية؟
 
طيب لما يرجع عالبيت ويخانق أخته لأنها طلت من الشباك بلا ما تغطي راسها منيح أو لأنها طلبت تروح تشوف صاحبتها! ليش بفكر هيك ليش؟
 
طيب عشان ما تقولوا بس بحكي عالذكور، مش فاهمة ليش
 
البنت اللي لابسة غطاء الرأس اللي المفروض أن يدل على تدين, بنفس الوقت بتلبس ملابس ضيقة !! ليش؟ والسؤال الأصعب إنه ليش أهلها اللي أصلا فرضوا عليها غطاء الرأس ما بشوفوا حرج في الملابس!
 
الأم اللي بتربي إبنها أنه كل شي مسموح له وأخته لأ.. بتشكي من جوزها ليش؟
 
المعلمين والمعلمات اللي بطالبوا تلاميذهم وتلميذاتهم بالاحترام ليش ما يكونوا قدوة ويحترموا الطلاب والطالبات ليش؟
 
الأهل اللي ما الهم خلق يقعدوا مع صغارهم ويتحدثوا معهم ويحاوروهم ويعلموهم وبتركوهم عالتلفزيون أو على الآيباد أو بالحارة ليش بخلفوا أصلا ليش؟
 
طيب ليش الاماكن الجيدة في أي مطعم مخصصة للمدخنين؟
وليش في ناس كل ما عطس الشخص عطسة بقولوا آمين؟؟؟
 
تساؤلات من وحي حياة يومية لمواطنة وأم عربية عاملة .., ناشطة حقوقية، سوشال ميديا غورو وشوفير تقود سيارتها أربع الى خمس ساعات يومياً ...
 
عروب صبح
*هذه المدونة باللغة العامية*

الرسالة الإخباريةأبرز الأحداث الدولية صباح كل يوم

ابق على اطلاع دائم بالأخبار الدولية أينما كنت. حمل تطبيق مونت كارلو الدولية