غادة عبد العال: "كونيكتين بيبول"

لما حصل التزاوج بين أجهزة التليفونات المحمولة وشبكة الإنترنت، الدنيا اتقلبت أكتر، التليفون المحمول بقاله وظايف أهم من إنك تتفق على خروجة مع واحد صاحبك، أو تعرف طلبات أمك من السوبر ماركت إيه؟  

 

أصبحت سهولة الوصول للمعلومات زي ما ليها فايدة كبيرة للناس، بتؤرق مضاجع الحكومات والدول، بالتليفونات المتوصلة للنت بتنتقد قرارات سياسية وبتتفق على أماكن مظاهرات وبتسقط حكومات عن طريق النص والصورة والفيديو.

 

سلاح عظيم موجود بين إيديك ، لكنه زي ما هو سلاح لكن كمان دليل إتهام وقت الفاس ما تقع في الراس، وعشان كده حكومات الدول القمعية أصبح هدف من أهدافها هو تليفونك المحمول اللي بيحمل أدلة على كل آراءك وأفعالك، وبقى من الطبيعي جدا إنك في أي قسم أو بوكس أو لجنة في الشارع أو كمين، يطلب منك بالذوق أو بالعافية، تفتح تليفونك وتوريهم اللي فيه.

 

 ولهذه الأسباب كلها، ولأننا نعيش في أيام لبش الناس فيها بتتلم من على القهاوي بتهمة شرب اتنين شاي، ولأن الطلب الثاني دايما في أي لجنة بعد فين بطاقتك؟  أصبح هات تليفونك، وافتح فيسبوكك إليك بعض النصائح اللي ممكن تقنع سيادة الباشا إنك ما تستحقش تقضي ليلة في حجز ولا تتحط إيديك في كلبش.  

 

١-إمسح تطبيق الفيس بوك من على تليفونك ما تخليش وصولهم ليه سهل قوي كده

٢-لما تدخل أدخل من على متصفح عادي وما تعملش حفظ لكلمة سر حساب الفيسبوك الأساسي عليه

٣- إعمل أكاونت تاني واملاه صور أطفال وورد ودباديب وآيات قرآنية.. بس ما تكترش من الآيات القرآنية لأن ده هيجر عليك برضه مشاكل كتير !

٤-إعمل لايك لصفحات كل الأخوات الكارداشيانيات (إخوات كيم) وصفحات الأرسنال وبرشلونة والبنات تعمل لايك لجاستين بيبر والولاد لسكارليت جوهانسون (ده لو لسه مش عاملين) !

٥-ضيف أصدقاء كتير من عينة (لولا المهبولة) و (توتا الشقية) .. والبنات تضيف (كلب بحر الأحزان) و(عاشق صهد الليل) وأي حد بروفايله بيقول إنه صايع وضايع وبتاع بنات!

٦- لو عايز تغرق في التمويه عليك بجروبات (صور سيكسي) (مقاطع ساخنة) ..وبالمناسبة ده لا يتعارض أبدا مع إنك تحط صورة كوفر فوتو أو بروفايل فيها آية قرآنية.. ده هو ده اللي هيأكدلهم إنك مواطن عندك فصام ومجنون وابن حلال !

٧-ما تكتبش بوستات مدحا في الحكومة و النظام ..عشان غالبا هيقبضوا عليك برضه ومش هيصدقوا إن فيه حد في عالمنا العربي الموكوس لسه بيرفع صوته حبا في أي نظام !

 

أدخل وأدخلي علي أي لجنة بأه وانتوا ماليين إيدكم وضامنين تروحوا بيتكم آخر الليل!

وربنا يسترها معانا جميعا من هذا الزمن اللي خلى الجهاز اللي كان شعاره (كونيكتينج بيبول) بأه أحد أكبر مساعد للناس اللي مهمتهم هي (كوليكتينج بيبول)!