تخطي إلى المحتوى الرئيسي
مدونة اليوم

غادة عبد العال: "سترونج إندبيندانت"

سمعي
مونت كارلو الدولية

حملة شعواء وحرب طاحنة ومعركة تكسير عظام يتم شنها اليومين دول على كل المنصات الرقميةوجميع مواقع التواصل الاجتماعي وهدفها هو تعبير (سترونج إندبيندانت وومان) أو (المرأة القوية المستقلة) و كأنه أعوذ بالله وعد بلفور أو أستغفر الله قرآن مسيلمة الكذاب !.

إعلان

التعبير أو اللقب بقاله مدة هدف هجوم رجالي كاسح لكن الجديد هو دخول البنات على الخط.
بوستات و مقالات وفيديوهات وحوارات صحفية كلها هدفها مهاجمة التعبير والتنصل من الفكرة ورفع شعار " بلا شغل بلا نيلة بلا استقلال بلا قرف، خدوا إيه اللي اشتغلوا، كسبوا إيه اللي استقلوا، بيتنا أولى بينا!"
بعضهن بنات لسه في مقتبل حياتهن لا عملوا كاريير ولا تورطوا في شغل البيت، والبعض الآخر بنات أكبر في السن داقوا سحل الشغل جوه البيت مع المرمطة براه وجابوا آخرهم من العيش والعيشة واللي عايشينها.
مبدأيا خلينا نتكلم في نقطتين أساسيتين: (وأتمنى ان الأخوات المعترضات يكونوا معانا)

مدونة وكاتبة مصرية ساخرة تمارس مهنة الصيدلة. بدأت مدونتها "عايزة اتجوز" عام 2006 قبل أن تنشر في كتاب عام 2009 تُرجم إلى لغات عدة عالمية منها الفرنسية وعرض في مسلسل حصل على الجائزة الفضية في مهرجان الإعلام العربي وحصلت عنه عبد العال على جائزة أحسن سيناريو. تكتب منذ 2009 مقالاً ثابتاً في الصحافة المصرية.

فيس بوك اضغط هنا

1ـ هل تعتبر المرأة من بني البشر أم أنها لاقدّر الله من الدواب؟
طالما انت بتعتبري نفسك من بني آدم إذا إنت بتعترفي انك عندك عقل وذكاء وقدرات خلقهوملك ربنا عشان تستغليهم لمصلحتك ومصلحة مجتمعك، الاعتناء بأولادك وكونك زوجة وأم جزء من سبب وجودك على هذه الأرض لكنها ليست الأسباب الوحيدة وإلا كان ربنا اكتفى بخلقك على قدر محدود من الذكاء يادوب يكفي الحمل والولادة و شكرا على كدا !
هل حضرتك عقدتي اتفاق ما مع الزمن يأمنك من تقلباته؟

2- هل انت ضامنة ان الشخص اللي بيصرف عليك يفضل للأبد يصرف عليك، سواء كان أب أو أخ أو زوج أو حتى ابن؟ ما حدش هيتوفى؟، ماحدش هيسافر؟ ماحدش هيلاقي نفسه مسئول عن عيلة أو مرض أو دين يخليه يؤثر في رعايتك؟ ما فيش انفصال؟ ما فيش طلاق؟ مش بافوّل عليك صدقيني، لكن في أي ظرف من دول حتلاقي نفسك مضطرة تكفي نفسك وتتكفلي بحالك، وساعتها لا هتلاقي عندك خبرة ولا قدرة إنك تبتدي عمل جديد بعد سنين من البعد عن السوق والركون لرمي الحمل كله على غيرك
الحياة مش بالبساطة دي يا ست البنات، لا اللي بيطلب الدلع بالضرورة يلاقيه ولا اللي بيهرب من الهم، الهم بيسيبه في حاله.
كفي نفسك يا ست الكل، واعتمدي على روحك واستغلي عقلك وقدراتك، وافضلي قوية، وجربي تكوني مستقلة ولو جزئيا حتى، وصدقيني هتدعيلي.

الرسالة الإخباريةأبرز الأحداث الدولية صباح كل يوم

الصفحة غير متوفرة

المحتوى الذي تريدون تصفحه لم يعد في الخدمة أو غير متوفر حاليا.