يجتمع العالم كله كل أربع سنوات في تظاهرة رياضية كبيرة تهدف في الأساس للتنافس الشريف والتبادل الثقافي وإعلاء قيم السلام بين دول العالم!وبينما يتنافس المتنافسون في العادة في كل أولمبياد على ألقاب الأسرع .. والأقوى .. والأعلى!
ينصب جام اهتمام المتابعين العرب في العادة على الأقصر والأضيق فيما يخص ملابس اللاعبات العربيات المشاركات في الأولمبياد لينتهي الأمر بفوز المتابعين العرب -عن استحقاق- بلقب الأتفه على الإطلاق!
فبينما نشرت إحدى وكالات الأنباء صورة للاعبتي كرة طائرة شاطئية واحدة محجبة ولابسة لبس مغطي جسمها بأكمله والتانية لابسة اللبس المعتمد عالميا للعبة دي و هو زي أشبه بالبيكيني ، معلقة على الصورة بتعليق لطيف وهو إن اختلاف الثقافات ما منعش اللاعبتين دول في الاستمتاع بالرياضة اللي بيحبوها، ودخلت جموع من المعلقين الغربيين يعلقوا تعليقات مشابهة إيجابية جميلة،
نسكت بأه ؟ ، نهدى ؟ ننبط ؟ ، طبعا لأ ، نصنا قلب الليلة دعوة للفضيلة و دروس في تعاليم الإسلام وخرجنا المتر والمازورة و بدأنا نقيس في لبس البنت ومدى مناسبته و عدم مناسبته للحجاب، وانبرى البعض الآخر في الإدلاء بدلوهم عن كون لبس البنت غير مناسب أصلا للمشاركة في المسابقة دي بالذات! ، وهكذا نصب نصنا نفسه المفتي الأكبر للديار الإسلامية ، بينما نصب البعض الآخر نفسه نائب رئيس اللجنة الأولمبية !
وبدأ الجدال من عينة .. هو ينفع واحدة تلعب رياضة وهي أصلا محجبة؟ .. البنت راضية وأهلها راضيين واللجنة الأوليمبية كلها راضية والأخ نبيه اخواته هو بأه اللي معترض!
هو ينفع واحدة محجبة و تلبس اللبس الضيق ده عشان قال إيه تلعب رياضة؟ .. لو حضرتك رئيس قسم تقييم لبس المحجبات الرياضيات في الآخرة يا ريت تبلغنا بس على حسب معرفتنا مافيش منصب والله بالإسم ده!
طب هو ينفع بنت أصلا تلعب رياضة وتقعد تتنطط و جسمها يتهز قدام الرجالة كده؟ .. آاااه هو ده بأه مربط الفرس!.
إذا كنت تقصد رجالة اللي هم بني آدمين عاديين وجايين يتفرجوا على لعبة رياضية مش رايحين نادي تعري .. فآه طبعا ينفع جدا .. أما لو كنت تقصد ذكور من عينتك اللي هم سايبين اللعبة و فنياتها ، وقاعدين براقبوا أنهي جزء من أجزاء جسم اللاعبات بيتهز عشان هم يتفرجوا عليه .. فآه ينفع برضه .. إن البنت اللي تكافح مجتمعات غبية وقواعد وتقاليد أغبى عشان تستمتع بحقها في لعب الرياضة .. لازم ندعمها و نحييها كلنا .. أما انت فتبقى تتفضل تشوف أي حاجة تانية مفيدة تعملها طالما مالكش أصلا في الرياضة والماتش مش على هواك !!
هؤلاء اللي كل أمالهم يحصروا بنات العرب في قمقم و يفضل معاهم مفتاحه .. هؤلاء اللي نفسهم ومنى عينهم تتحول كل بنت لبروطة وكل ست لشلته ما بتتحركش من مكانها قيد أنملة .. هؤلاء اللي لولا الملامة كانوا حطوا السلاسل والجنازير في رقبة كل أنثى تعيش على أرض هذا الجزء الخزعبلي من العالم .. هؤلاء اللي شايفين كل أنثى هي حتة لحمة تتجمع دايما حواليها الكلاب وشايفين نفسهم بطبيعة الحال مجموعة من الكلاب!
بنقولهم عليكم واحد .. هنفضل نكسر القيود و ننط السدود ومش هنحصر نفسنا جوه نظراتكم القاصرة وأفقكم الضيق وعقلياتكم الشهوانية الغبية و هنبقى في يوم الأعلى والأسرع والأقوى ولا عزاء لأتفه من خلق الله على الأرض من أمثالكم!
الرسالة الإخباريةأبرز الأحداث الدولية صباح كل يوم
اشترك